VEREFFENING VAN DIENSTEREKENINGE

ELEKTRONIESE BETALINGS

Maak asseblief seker dat u u diensterekening

voor of op die 25ste dag van elke maand betaal.

Verseker dat u diensterekeningnommer vermeld word wanneer u direkte inbetalings in die Munisipaliteit se bankrekening doen ten opsigte van u diensterekening,  indien nie,  aanvaar die Munisipaliteit nie verantwoordelikheid wanneer dienste foutiewelik afgesny word nie.  Inbetalingstrokies moet gefaks word na 027-7121635.

STEINKOPF  -  KRAGTOEVOER ONDERBREKING

Kennis is ontvang van ESKOM dat die kragtoevoer na Steinkopf op Sondag, 6 November 2005 vanaf 08:00 tot 16:00 onderbreek sal word om sekere herstel- en instandhoudingswerke te doen.

Dit is belangrik dat inwoners kennis neem dat die toevoer te enige tyd aangeskakel kan word sodra die herstelwerk afgehandel is.  Alle elektriese installasies moet egter te alle tye as lewendig beskou word.

BOEDELS

Alle boedels van oorledenes moet geregistreer word kragtens die Boedelwet van 1965.

Waar ‘n verbruiker oorlede is en die waarde van die boedel/eiendom minder is as R50 000,00 - kan die naasbestaandes/begunstigdes van die oorledene self die boedel registreer by die Meester van die Hooggeregshof in die Noord-Kaap in lyn met Artikel 18(3) van Wet 66 van 1965.

Die vorms wat in so ‘n geval voltooi moet word is beskikbaar by alle dienspunte binne die Nama Khoi munisipale gebied.  Hulp met die voltooiing van die vorms kan deur die dienspuntpersoneel verleen word.

KRAGONDERBREKING – SPRINGBOK – 13 OKTOBER 2005

Op 13 Oktober 2005 is daar ‘n kragonderbreking ondervind in Bergsig, Matjieskloof en Springbok as gevolg van ‘n onbekende persoon wat die isolators op die kragpale stukkend geskiet het.

Vandalisme van hierdie aard bring groot ongerief en verliese mee.

Ons wil graag ‘n beroep op inwoners doen dat indien u opmerk dat iemand skade aan munisipale eiendom aanrig,  om sodanige geval skriftelik aan die Munisipaliteit te rapporteer.  Indien die skuldige skuldig bevind word,  word ‘n eis teen die skuldige ingedien om te betaal vir die herstelkostes en ontvang die persoon wat die oortreding gerapporteer het ‘n beloning van R100,00 by die Munisipaliteit.

ONTHOU !!!!!

Munisipale eiendom behoort aan u en moet u trots wees daarop.

HOU ONS DORPE SKOON !!!!!!

‘n Vriendelike beroep word op inwoners gedoen om asseblief die vrymoedigheid te neem om self onkruid op die sypaadjies voor hulle erwe te skoffel of te laat skoffel om sodoende ons dorpe mooi en sindelik te laat vertoon.  Ons rig hierdie versoek aangesien dit nie vir die Munisipaliteit moontlik sal wees om al ons dorpe voor die Kerstyd skoon te maak nie.

Die sakesentrum vertoon gewoonlik na ‘n besige Vrydag en Saterdag nie netjies nie en die oorsaak is ons as inwoners se eie skuld,  omdat ons nie die vullishouers gebruik om ons vullis in te stort nie en die vullis op die sypaadjie stort.  Die Munisipaliteit het nou meer vullisdromme in die dorpe aangebring en ons versoek u vriendelik om asseblief vullis binne in die dromme te stort.

Dit is die plig van elke okkupeerder/eienaar van ‘n winkel of handelsperseel om toe te sien dat die sypaadjie voor of aangrensend aan sodanige winkel,  vry en skoon te hou van enige vullis en afvalmateriaal.  Maak dus asseblief voor u perseel skoon.

Ons doen ook ‘n beroep op smouse om asseblief die gebiede waar hulle handeldryf skoon en netjies te hou.

BAIE DANKIE VIR U SAMEWERKING

OM DIE NAMA KHOI MUNISIPALE GEBIED

‘ N PRAGTIGE ,  SKOON EN NETJIESE GEBIED TE MAAK !!!!!

BERGSIG & MATJIESKLOOF DIENSPUNTKANTORE

Die gemeenskappe van Bergsig en Matjieskloof moet kennis neem dat Dienspuntkantore geopen is en dat u voortaan u diensterekening daar kan betaal en ook enige navrae kan doen.

           Die telefoonnommers vir die Dienspuntkantore is soos volg:

                        Bergsig ………………………… (027) 7188169

                        Matjieskloof ……………………. (027) 7182092

OPENBARE BESKERMER

Die Openbare Beskermer besoek Springbok op 25 November 2005 .

Hy sal vanaf 08:00 tot 14:00 by die Dienspunt Kantoor in Springbok beskikbaar wees vir enigeen wat graag met hom in gesprek wil tree.

HENKRIES & GOODHOUSE

KRAGTOEVOER ONDERBREKING

Kennis is ontvang van ESKOM dat die kragtoevoer na Doringwater-, Henkries- en Henkriesmond Substasies (Henkries en Goodhouse) op Sondag, 27 November 2005 vanaf 08:00 tot 16:00 onderbreek sal word om sekere herstel-  en instandhoudingswerke te doen.

Dit is belangrik dat inwoners kennis neem dat die toevoer te enige tyd aangeskakel kan word sodra die herstelwerk afgehandel is.  Alle elektriese installasies moet egter te alle tye as lewendig beskou word.

BUFFELSRIVIER

In die saak tussen Nama Khoi Munisipaliteit (eiser) en die Buffelsrivier Advieskomitee (Verweerder) wat op 12 Oktober 2005 in die Landdroshof te Springbok voorgekom het oor die Buffelsrivier Gemeenskapsaal,  was die uitspraak soos volg:

“Vonnis vir uitsetting teen Verweerder gelas met koste betaalbaar deur die lede van die Buffelsrivier Advieskomitee,  gesamentlik en afsonderlik.

Die Verweerder sal die saal teen einde Oktober 2005 ontruim.”