NAMA KHOI MUNISIPALITEIT

OMSENDBRIEF – NOVEMBER 2005

                                  Boodskap van die Burgemeester

        Raadslid Simboyia

Kersfees is ‘n tyd van hoop en verwagting,  wanneer die geheimenis van ons herinneringe herwaardeer word onder die sagte gloed van God se liefde.  Of jy nou die verwagting van die jeug of die besadigheid van die ouderdom het – die boodskap van die Christusfees is vir almal.

Die gees van Kersfees leef van dag tot dag in die harte van mense.  Liefde, vreugde, vrede, geduld, goedheid, barmhartigheid, getrouheid, verdraagsaamheid en selfbeheersing – dit alles is ervaar toe Christus gebore is,  nie in ‘n krip nie,  maar in die harte van doodgewone mense.  ‘n Lewe aan Christus toegewy sal deur die hele jaar die gees van Kersfees openbaar,  tot eer van God.

Ek wil graag aan almal binne die Nama Khoi Munisipale gebied ‘n baie geseënde en gelukkige Kersfees toewens.  Geniet elke oomblik van die kerstyd saam met u familie en geliefdes.

Baie dankie aan alle verbruikers en lede van die gemeenskap,  dat u so getrou u dienste-, instandhouding-,   en belastingrekening vereffen,  en sodoende bydra tot die sukses en voortbestaan van Nama Khoi Munisipaliteit.

Aan elke amptenaar van Nama Khoi Munisipaliteit wil ek graag die dank en waardering vanaf die Raad oordra vir die goeie diens wat u lewer om die werksaamhede van Nama Khoi Munisipaliteit vlot te laat verloop.

Baie dankie aan elke raadslid vir u samewerking en die bydrae wat u lewer.

Ons sien uit na ‘n voorspoedige en gelukkige 2006.

Groete

Liena Simboyia

Burgemeester

STANDAARD KONSEPVERORDENINGE

Kennisgewing in terme van artikel 12 (3) van Wet 32 van 2000,  die Wet op Plaaslike Regering:  Munisipale Stelsels,  2000.

Kennis geskied hiermee dat die LUR vir Plaaslike Regering in die Noord Kaap,  Standaard Konsepverordeninge uitgevaardig het in terme van Artikel 14(20)(a) van Wet 32 van 2000.

Nama Khoi Munisipaliteit is van voorneme om die voorgestelde verordeninge aan te neem en te publiseer in die Provinsiale Koerant as verordeninge van die Munisipaliteit.

Die voorgestelde verordeninge sal vanaf Maandag, 07 November 2005,  by alle Dienspunte van Nama Khoi Munisipaliteit ter insae lê vir openbare kommentaar,  insette en vertoë.

Bogenoemde insette,  vertoë en kommentaar kan gerig word aan die Munisipale Bestuurder en moet ontvang word by Privaatsak X22, Springbok, 8240 teen nie later as 5 Desember 2005 nie.

                   AFSNY VAN MUNISIPALE DIENSTE                    

Inwoners wat ’n gewoonte daarvan maak om nie hulle munisipale diensterekeninge en of belasting te betaal nie,  sal voortaan streng vasgevat word.  Ook inwoners wat per abuis vergeet om hulle rekeninge te betaal sal ongelukkig ook daaronder lei in die Raad se nuutste poging om wanbetalers vas te vat.

Die Munisipaliteit het die dienste van ’n eksterne kontrakteur bekom wat voortaan alle wanbetalers,  van belasting- en dienstegelde,  se elektrisiteit of water of albei sommer sal afsny.

Alle inwoners word dus versoek om asseblief toe te sien dat hulle rekeninge stiptelik betaal word,  en indien u weens onvermydelike omstandighede verhoed word om die betaling te doen moet u vooraf (voor 24ste van die maand) die betrokke Dienspunthoof nader sodat ’n spesiale reëling vir u getref kan word.

Die Kontrakteur gaan deur die Kersseisoen werk,  en om te voorkom dat u dalk vir dae sonder krag of water sit moet u vroegtydig reëlings tref,  veral as u met vakansie gaan.

Ons wil graag persone wat van internet bankdienste gebruik maak,  versoek om u rekening vroegtydig te betaal.  U betaling moet voor of op die 25ste dag van elke maand op ons bankstaat verskyn.  Somtyds neem dit ’n geruime tyd (tot 3 dae),  vir ’n transaksie om op ons bankstaat te verskyn.  Sorg asseblief ook dat u munisipale rekeningnommer vermeld word.  Tans is daar duisende rande se betalings deur inwoners gemaak waarvan die oorsprong nie opgespoor kan word nie.

Namens die Raad en bestuur vra ons verskoning aan u,  die gereelde betaler,  dat u nou ook geraak word deur hierdie streng optrede.  Indien meer fondse op hierdie manier geïn kan word sal die Munisipaliteit se finansiële posisie verbeter en sal u ’n beter diens ten opsigte van byvoorbeeld die herstel van strate van ons kan verwag.

Reis versigtig en kom veilig tuis  !!!!

                           Moenie drink en bestuur nie !!!!

ONDERBREKINGS IN WATERTOEVOER

Neem asseblief kennis dat Namakwa Water besig is om ’n gedeelte van die pyplyn tussen Henkries suiweringswerke en Doringwater pompstasie te vervang.  Dit kan egter gebeur dat daar onderbrekings in die watertoevoer tydens die koppeling van die pype mag ontstaan.

Ons vertrou dat dit nie te veel ongerief sal veroorsaak nie.

KRAGONDERBREKING

HENKRIES- EN HENKRIESMOND SUBSTASIES

Kennis is ontvang van ESKOM dat die kragtoevoer na Henkries- en Henkriesmond Substasies op Sondag,  11 Desember 2005 vanaf 08:00 tot 16:00 onderbreek sal word om sekere herstel- en instandhoudingswerke te doen.

Dit is belangrik dat inwoners kennis neem dat die toevoer te enige tyd aangeskakel kan word sodra die herstelwerk afgehandel is.  Alle elektriese installasies moet egter te alle tye as lewendig beskou word.

        NA-URE NOODNOMMERS       

           NOODGEVALLE                     10177 / 027 71 28000

           WATER                                    027 71 88141 / 072 108 2901

          ELEKTRISITEIT                       083 649 3427

          RIOOL                                      027 71 88142 /  073 154 6653

Dit maak sin om u dienste- en belastingrekening te betaal omdat dit bydra tot ontwikkeling in u gemeenskap.

Betaal asseblief u diensterekening voor of op die 25ste dag van elke maand.